AB News-ဧပြီ ၂၊ ၂၀၂၅

ငလျင်ဘေးဒဏ်သင့် ပြည်သူများအတွက် ထောက်ပံ့ရေးပစ္စည်းများ ယူဆောင်လာသည့် တရုတ်နိုင်ငံကြက်ခြေနီ အသင်းမှ ယာဥ်တန်း ၉ စီးကို စစ်ကောင်စီက စက်သေနတ်ဖြင့် ပစ်ခတ်ခဲ့ကြောင်း တအာင်းလွတ်မြောက်ရေး တပ်မတော် (TNLA ) မှ ဧပြီလ ၁ ရက်နေ့တွင် ထုတ်ပြန်‌ပြောဆိုထားသည်။

အဆိုပါ ယာဉ်တန်းသည် မန္တလေးမြို့သို့ သွားရောက်ရန် စစ်ကောင်စီအား အသိပေးအကြောင်း ကြားထားသော်လည်း ဧပြီလ ၁ ရက်နေ့တွင် နောင်ချိုမြို့နယ်၊ အုမ္မတီးကျေးရွာအနီး စစ်ကောင်စီတပ်ဖွဲ့ဝင်များ၏ စက်သေနတ်ဖြင့် ပစ်ခတ်တိုက်ခိုက်ခြင်းကို ခံခဲ့ရသဖြင့် နောင်ချိုမြို့သို့ ပြန်လည်ဆုတ်ခွာခဲ့ရသည်။

လက်ရှိအချိန်တွင် TNLA တပ်ဖွဲ့ဝင်များသည် တရုတ်ကြက်ခြေနီအသင်း၏ ယာဉ်တန်းကို ကာကွယ်စောင့်ရှောက်ထားပြီး ငလျင်ဘေးဒဏ်ခံစားနေရသော ပြည်သူများထံ အကူအညီပစ္စည်းများ ရောက်ရှိစေရေးအတွက် ကူညီဆောင်ရွက်သွားမည်ဟု ဆိုသည်။

မြန်မာနိုင်ငံတွင် ငလျင်ဘေးဒဏ်ကို ခံစားနေရချိန် စစ်ကောင်စီတပ်ဖွဲ့ဝင်များသည် တိုက်ပွဲဖြစ်ပွားခြင်းမရှိသည့် နယ်မြေများကိုလည်း နေ့စဉ်လေကြောင်းမှ ဗုံးကြဲတိုက်ခိုက်မှုများ ပြုလုပ်လျက်ရှိသည်။