AB News – ဧပြီ ၁ ၊ ၂၀၂၅
မြန်မာနိုင်ငံတဝန်း ပြင်းထန်သည့် ငလျင်လှုပ်ခတ်မှုကြောင့် အိုးဘိုအကျဥ်းထောင် စခန်းတွင် သေဆုံးသူ ၁၂ ဦးထိ ရှိလာပြီး ဒဏ်ရာရရှိသူအများအပြားရှိကြောင်း မြန်မာနိုင်ငံလုံးဆိုင်ရာ နိုင်ငံရေး အကျဥ်းသားများကွန်ရက် ( PPNM ) မှ ဧပြီလ ၁ ရက်နေ့တွင် ထုတ်ပြန်လိုက်သည်။
ငလျင်လှုပ်ခတ်မှုကြောင့် အိုးဘိုအကျဥ်းထောင်တွင် အမျိုးသမီး အဆောင် ၁ နှင့် အမျိုးသမီး အဆောင် ၂ ပြိုကျ၍ အနည်းဆုံး ၂ ဦးသေဆုံးခဲ့ပြီး ၁၀ ခန့် ထိခိုက်ဒဏ်ရာရရှိခဲ့ကြောင်း PPNM က ဆိုသည်။
အလားတူ အိုးဘိုအကျဥ်းထောင်အတွင်းရှိ အမျိုးသားဆောင် အလုပ်ရုံပြိုကျခဲ့သည့်အတွက် အမျိုးသား ၁ ဦးသေဆုံးခဲ့ပြီး ၁ ဦးပြင်းထန်ဒဏ်ရာရရှိခဲ့ကြောင်း PPNM က အတည်ပြုပြောဆိုထားသည်။
အိုးဘိုအကျဥ်းထောင်တွင် ပြင်းထန်သည့် ငလျင်လှုပ်ခတ်မှုကြောင့် အဆောင်များကြားတွင် ကာရန်ထားသည့် အုတ်ရိုးများလည်းပြိုကျမှုရှိခဲ့ကြောင်း သိရှိရသည်။
သေဆုံးသူများနှင့် ဒဏ်ရာရရှိထားသူများမှာ အကျဥ်းသား (သို့) ဝန်ထမ်းဖြစ်ခြင်းကို သီးခြားကောက်ယူနိုင်ခြင်းမရှိသေးသော်လည်း လက်ရှိအတည်ပြုထားနိုင်သည့် ကျား/မအရေအတွက် စုစုပေါင်း ၄ ဦးရှိကြောင်း PPNM က ထုတ်ပြန်သည်။
ထပ်မံအတည်ပြုနေဆဲ သေဆုံးသူ ၈ ဦးအထိရှိပြီး အိုးဘိုအကျဥ်းထောင်တွင် စုစုပေါင်းသေဆုံးသူ ၁၂ ဦးထိရှိကြောင်း PPNM က ဆိုသည်။
PPNM က စစ်ကောင်စီထုတ်ပြန်ထားသည့် ငလျင်ကြောင့် ထိခိုက်ဒဏ်ရာရရှိသူ စာရင်းတွင် အကျဥ်းထောင်မှ သေဆုံးထိခိုက်ဒဏ်ရာရရှိသူများကို ထည့်ပေါင်းထားခြင်းရှိ မရှိ အတည်မပြုနိုင်သေးပါ။