
AB News – ဧပြီ ၃၊ ၂၀၂၅
မြန်မာနိုင်ငံအတွင်း ငလျင်ကြောင့် လူသားချင်းစာနာထောက်ထားမှုဆိုင်ရာ အပစ်ခတ်ရပ်စဲထားသော ရက္ခိုင်ပြည်နှင့် ကချင်ပြည်တို့တွင် စစ်ကောင်စီကအပြင်းအထန် ဗုံးကြဲတိုက်လျှက်ရှိသည်ကို တွေ့ရသည်။
ယနေ့ ဧပြီလ ၃ရက်၊ မွန်းလွဲပိုင်း ၁၁နာရီ၊ ၄၀ မိနစ်ခန့်အချိန်အထိ ကျောက်ဖြူမြို့နယ်အတွင်း စစ်ကောင်စီက ဒရော့ဗုံး ၃၃ လုံးထက်မနည်း ဗုံးကြဲတိုက်ခိုက်ခဲ့ပြီး လက်နက်ကြီး ၃၀ ကျော် အဆက်မပြတ် ပစ်ခတ် တိုက်ခိုက်မှုများ ပြုလုပ်နေကြောင်း စစ်ရေးသတင်းရင်းမြစ်က အတည်ပြုပြောသည်။
ကချင်ပြည်နယ်၊ ဝိုင်းမော်မြို့နယ်၊ လမြန်ကျေးရွာအနီးရှိ KIA စခန်းနေရာများကို စစ်ကောင်စီအဖွဲ့က ထိုးစစ်ဆင်နေပြီး လေကြောင်းတိုက်ခိုက်မှုများ လုပ်ဆောင်နေကြောင်း KIO ဒုတိယဥက္ကဌ ဒု-ဗိုလ်ချုပ်ကြီး ဂွန်မော်က ၎င်း၏ လူမှုစာမျက်နှာတွင် ရေးသားထုတ်ပြန်ထားသည်။
ထို့အပြင် ယမန်နေ့ ဧပြီလ ၂ရက်၊ နေ့လည် ၁ နာရီ၊ ၁၅ မိနစ်ခန့်အချိန်တွင် ချင်းပြည်နယ်၊ တောင်ပိုင်းဒေသရှိ ကန်ပက်လက်မြို့နယ်ကို စစ်ကောင်စီအဖွဲ့က ဂျက်ဖိုက်တာဖြင့် အကြိမ်ကြိမ် ဗုံးကြဲတိုက်ခိုက်ခဲ့ကြောင်း ကန်ပက်လက်မြို့နယ် ပြည်သူ့အုပ်ချုပ်ရေးအဖွဲ့က ထုတ်ပြန်ထားသည်။
ကန်ပက်လက်မြို့နယ်တွင် ဗုံးကြဲတိုက်ခိုက်မှုကြောင့် လူနေအိမ်များအပါအဝင် အစိုးရအဆောက်အဦး ၂၀ ခန့် ပျက်စီသွားကြောင်း သိရသည်။
ငလျင်ကယ်ဆယ်ရေးလုပ်ငန်းများ ဆောင်ရွက်ရန်ဆိုသော အကြောင်းပြချက်ဖြင့် အကြမ်းဖက်စစ်ကောင်စီသည် တစ်ဖက်သက် အပစ်အခတ်ရပ်စဲရေးကို ၂၀၂၅ ခုနှစ်၊ ဧပြီလ ၂ရက်နေ့မှ ၂၂ ရက်နေ့အထိ သတ်မှတ်ထားသည်။
ထို့အတူ အာရက္ခတပ်တော်(AA)၊ တအာင်း အမျိုးသားလွတ်မြောက်ရေးတပ်မတော်(TNLA)နှင့် မြန်မာအမျိုးသားမဟာမိတ်တပ်မတော်(MNDAA) ပါဝင်သော မြောက်ပိုင်းညီနောင် မဟာမိတ်အဖွဲ့၊ ကချင်လွတ်မြောက်ရေးအဖွဲ့(KIO)နှင့် အမျိုးသားညီညွတ်ရေးအစိုးရ(NUG) တို့သည်လည်း လူသားချင်းစာနာထောက်ထားရေးဆိုင်ရာ အပစ်အခတ်ရပ်စဲထားသည်ကို တွေ့ရသည်။
ငလျင်ဘေးကာလအတွင်း အာဏာသိမ်းစစ်ကောင်စီသည် အပစ်အခတ်ရပ်စဲရေးကို ကြေညာထားသော်လည်း တိုင်းနှင့် ပြည်နယ်အချို့တွင် ဗုံးကြဲတိုက်ခိုက်မှုများကို အဆက်မပြတ် ပြုလုပ်နေသည်ကို တွေ့ရှိရသည်။
ပြီးခဲ့သည့် မတ်လ ၂၈ရက်၊ နေ့လည် ၁၂ နာရီကျော်အချိန်တွင် မြန်မာနိုင်ငံအတွင်း လှုပ်ခတ်ခဲ့သည့် ငလျင်ကြောင့် ဒေသခံပြည်သူ တစ်သောင်းမှ တစ်သိန်းခန့်အထိ သေဆုံးနိုင်ကြောင်း အမေရိကန်အစိုးရ ဘူမိဗေဒ စစ်တမ်း(USGS) က ခန့်မှန်းထုတ်ပြန်လိုက်သည်။
မြန်မာနိုင်ငံတစ်ဝန်း သေဆုံးသူဦးရေ ၃၀၀၀ ကျော်နှင့် ဒဏ်ရာရရှိခဲ့သူဦးရေ ၄၅၀၀ ခန့်ရှိကြောင်း ပြည်တွင်းပြည်ပ မီဒီယာများအရ သိရှိရသည်။