ABN-ရှိုင်းမိုး
ဇွန် ၈ရက်
ယခုလ ဇွန်လ ၅ရက်နေ့က ချင်းပြည်နယ် ပလက်ဝမြို့နယ်တွင် မိုးကြိုးပစ်ခံရ၍ အမျိုးသမီး ၂ဦးသေဆုံးခဲ့သည်ဟုသိရသည်။
ထိုမိုးကြိုးပစ်ခံရသော အမျိုးသမီး ၂ယောက်မှာ ပလက်ဝမြို့နယ် အောက်ဘလိုင်းရွာမှ အသက် ၅၀နှစ်အရွယ် ဒေါ်ကိုးယက်နှင့် အသက် ၃၇နှစ်အရွယ် ဒေါ်ဝင်းဆွေတို့ဖြစ်သည်။
သူတို့ နှစ်ဦးသည် ဇွန်လ ၅ရက်နေ့က တောင်ယာခင်းမှ ပေါင်းပင်များနှုတ်၍ အိမ်အပြန်လမ်းတွင် မိုးကြိုးပစ်ခံရ၍ နှစ်ဦးလုံး သေဆုံးသွားကြောင်း အောက်ဘလိုင်းရွာမှ ဦးမောင်စံချေက ပြောသည်။
“သူတို့နှစ်ယောက်လုံးက တစ်ရွာတည်းကပါ၊ တောင်ကိုပေါင်းပင်သွားနုတ်တာကပြန်လာတာပါ၊ တောင်ယာကအပြန်မှာမိုးကြိုးပစ်ခံရတာပါ” ဟုပြောသည်။
ပြီးခဲ့သည် မေလတွင်လည်း မင်းပြားမြို့နယ်၊ ရမ်းဗြဲမြို့၊ ကျောက်ဖြူ၊ ရသေ့တောင်တို့တွင် မိုးကြိုးပစ်ခံရပြီး ဆယ်ကျော်သက်အရွယ် လူငယ် ၅ယောက် သေဆုံးခဲ့သည်။