သတင်းမီဒီယာ - ရခိုင် ၊ အာရကန် ၊ အာရက္ခ

Generic selectors
Exact matches only
Search in title
Search in content
Post Type Selectors
ကျောက်ဖြူ ဇင်ချောင်းရွာ လက်နက်ကြီးထိမှန် ၊ ရဟန်း ၁ ပါး ပျံလွန်၊ အရပ်သား ၁ ဦး သေဆုံး

AB News-မတ် ၃၁၊ ၂၀၂၅

စစ်ကောင်စီက ယနေ့ ၊မတ်လ ၃၁ ရက်နေ့ ၊နံနက်ပိုင်းတွင် ကျောက်ဖြူ ဇင်ချောင်းကုန်ဘွေကျေးရွာကို (နေဗီ)မှ လက်နက်ကြီးပစ်ခတ်မှုကြောင့် ရဟန်းတော် ၁ ပါးပျံလွန်တော်မှုကာ၊ ပြည်သူ ၁ ဦးသေဆုံးပြီး ထပ်မံ ဆရာတော်ကြီးတစ်ပါးနှင့် ကိုရင် ၁ ပါးအပါအဝင် ပြည်သူ ၇ ဦး ပြင်းထန်ဒဏ်ရာ ရရှိခဲ့ကြောင်း AB News က စုံစမ်းသိရသည်။

ပျံလွန်တော်မူသွားသော ရဟန်းတော်မှာ ကျောက်ဖြူမြို့နယ်၊ ဇင်ချောင်း ကုန်ဘွေကျေးရွာမှ သက်တော် ၃၂ နှစ်အ ရွယ် အရှင်အာဒိစ္စဖြစ်ပြီး သေဆုံးသွားသော ပြည်သူမှာ အသက် ၃၀ နှစ်အရွယ် ဦးဘဂျမ်း ဖြစ်ကြောင်း သိရသည်။

အလားတူ ဇင်ချောင်း ကုန်ဘွေကျေးရွာမှ ဆရာတော်ကြီး အရှင်ဇနိတ (သက်တော် ၇၄ နှစ်)၊ ကိုရင် အရှင်ဓမ္မာနန္ဒ (သက်တော် ၁၂ နှစ်)၊ ဦးမောင်ထွန်းမြ ( ၄၅ နှစ်)၊ ဒေါ်သန်းသန်းအေး ( ၅၀ နှစ်) အပြင် စစ်ဘေး ရှောင်လာသည့် အုန်းတောရွာမှ ‌ဒေါ်ဖြိုးဖြိုးဝင်း (၃၁ နှစ်)၊ ကင်းပင်လယ်နားရွာသစ်မှ ဒေါ်သိန်းဟန်နု (၅၅ နှစ်) နှင့် ဆင်တက်မော်ရွာသစ်ကျေးရွာမှ မခင်မြအေး (၁၆ နှစ်) တို့တွင်လည်း ပြင်းထန်ဒဏ်ရာ ရရှိခဲ့ကြောင်း သိရသည်။

ကျောက်ဖြူမြို့နယ်၊ မင်းရပ်တိုက်နယ်၊ ဝါးနက်ချွိန် ကျေးရွာအနီးတွင် ကျောက်ချထားသည့် စစ်ကောင်စီနေဗီ တစ်စီးမှ နံနက် ၉ နာရီအချိန်တွင် ဇင်ကျောင်းကုန်ဘွေကျေးရွာဘက်သို့ လက်နက်ကြီး ၃ လုံးပစ်ခတ်ခဲ့ကြောင်း သိရသည်။

၎င်းလက်နက်ကြီးသည် ဇင်ချောင်းကုန်ဘွေကျေးရွာ ဘုန်းတော်ကြီးဓမ္မာရုံ၊ အောင်မင်္ဂလာရပ်ကွက်နှင့် လမ်းမ ကြီးများတွင် ကျရောက်ပေါက်ကွဲခဲ့သည်။

လက်နက်ကြီး ကျရောက်ပေါက်ကွဲချိန်အတွင်း ဦးဘဂျမ်းမှာ ပွဲချင်းပြီးသေဆုံးကာ ရဟန်းတော် အရှင်အာဒိစ္စ တွင်မူ လက်နက်ကြီးကျည်စ ပြင်းထန်သဖြင့် ဆေးကုသမှုခံယူနေစဥ် ပျံလွန်တော်မူခဲ့သည်။

လက်ရှိတွင် ဆရာတော် တစ်ပါး နှင့် ကိုရင်တစ်ပါး အပါအဝင် ဒဏ်ရာပြင်းထန်သော ပြည်သူ ၅ ဦးမှာလည်း ဆေးကုသမှုခံယူနေရကြောင်း သိရသည်။

ထို့အပြင် စစ်ကောင်စီသည် ကျောက်ဖြူ ကုလဘာကျေးရွာကိုလည်း မတ်လ ၂၇ ရက် နှင့် ၃၁ ရက်နေ့တွင်လည်း ဒရုန်းဖြင့် ဗုံးကြဲ တိုက်ခိုက်မှုများပြုလုပ်ခဲ့သည်။

ထင်မြင်ယူဆချက်‌‌ပေးရန်

ဆက်စပ်သတင်းများ