AB News – နိုဝင်ဘာ ၄ ရက်
စစ်ကိုင်းတိုင်း ၊ကလေးမြို့နယ် ကလေး-တမူးလမ်းကြားတွင် ညီနောင်မဟာမိတ် ၃ ဖွဲ့နှင့် စစ်ကောင်စီတို့တိုက်ပွဲပြင်းထန်နေကြောင်း သတင်းရရှိသည်။
စစ်ကောင်စီသည် ဂျက်တိုက်လေယာဥ်ဖြင့် ၎င်းလမ်းကြားသို့ ဗုံးကြဲတိုက်ခိုက်နေ၍ ဒေသခံပြည်သူများ ထွက်ပြေးနေရကြောင်း ရာဇဂြိုလ်ရွာမှ အမျိုးသမီးတစ်ဦးက AB News သို့ပြောသည်။
“ကလေးနဲ့တမူးလမ်းတွေကို စစ်ကောင်စီက ဗုံးကြဲတိုက်ခိုက်တယ်၊ ဂျက်လေယာဥ်တွေနဲ့လှမ်းပစ်နေတယ် ၊ ပြည်သူတွေထွက်ပြေးနေကြရတယ်” ဟု ဆိုသည်။
၂ ဖက်တိုက်ပွဲကြောင့် ပြည်သူတွေအထုတ်အပိုးတွေထမ်းပြီး လမ်းဘေးနားတွင် ထိုင်နေရပြီး မည်သည့်ဖက်ကိုသွားရမှန်းမသိ ဖြစ်နေကြောင်း ဒေသခံများကပြောသည်။
ရွာများကို ဗုံးကြဲတိုက်ခိုက်နေသည့်ကြောင့် တောထဲသို့ပြေးနေကြရကြောင်းလည်း ဆက်၍ပြောသည်။
ကျမတို့အခုတောထဲကိုပြေးနေရပါတယ်၊ ရွာထဲမှာတစ်ယောက်မှမရှိကြတော့ဘူး၊ လယ်ပြင်ထွက်ပြီးတဲစင်တွေမှာနေရတယ်၊ ဘုန်းကြီးကျောင်းတွေမှာနေကြတယ်၊ ပြေးနေရတယ်” ဟုပြောပြီး ဖုန်းချသွားခဲ့သည်။
စစ်ကောင်စီတပ်သည် ယမန်နေ့ကလည်း ကလေး -တမူးလမ်းသို့ လေကြောင်းမှ ၃ကြိမ်ခန့်လာရောက်ပစ်ခတ်ခဲ့ကြောင်း ကလေးဒေသခံများကဆိုသည်။
လက်ရှိအချိန်တွင် ၁၀၂၇ စစ်ဆင်ရေး ညီနောင်မဟာမိတ် ၃ ဖွဲ့နှင့် စစ်ကောင်စီတို့ ထိုးစစ်ဆင်တိုက်ခိုက်လျက်ရှိနေသည်။