AB News -ဖေဖော်ဝါရီ ၂၆ ၊ ၂၀၂၅
ယမန်နေ့ ဖေဖော်ဝါရီလ ၂၅ ရက်နေ့က ရက္ခိုင်ပြည်၊ ကျောက်ဖြူမြို့နယ်နှင့် မြောက်ဦးမြို့နယ်တို့တွင် နေရာ ၂ ခုကို စစ်ကောင်စီမှ လေကြောင်းဖြင့် ဗုံးကြဲတိုက်ခိုက်ခဲ့သည် ဟု သိရသည်။
မြောက်ဦးမြို့နယ်၊ လေညင်းတောင်ကျေးရွာကို ယမန်နေ့ ည ၁၁ နာရီခန့်က အကြမ်းဖက်စစ်ကောင်စီက Y-12 လေယာဉ်ဖြင့် ဗုံးကြဲချခဲ့သည်ဟု ဒေသခံ ၁ ဦးက AB News သို့ ပြောသည်။
‘’ ည ၁၁ နာရီလောက်မှာ လာချတာ။ ပြည်သူတွေ အိပ်နေတဲ့ အချိန် ချတာ။ ကံကောင်းလို့ ရွာပြင်မှာ ကျသွားတယ်။ လူတော့ အထိအခိုက်မရှိဘူး၊ စိုက်ခင်းတွေ ပျက်စီးသွားတယ်’’ ဟု ပြောသည်။
ပြီးခဲ့သည့် ၂၀၂၄ ခုနှစ် မတ်လ ၂၁ ရက်နေ့ကလည်း မြောက်ဦးမြို့နယ် အထက်လေညှင်းတောင် ကျေးရွာကို စစ်ကောင်စီက ဂျက်တိုက်လေယာဉ်ဖြင့် ဗုံးကြဲတိုက်ခိုက်ခဲ့သောကြောင့် ကလေး ၄ ဦး အပါအဝင် ဒေသခံ ၅ ဦးသေဆုံးခဲ့ကာ ၁၂ ဦးထိခိုက်ဒဏ်ရာရရှိခဲ့သည်ဟု သိရသည်။
ယင်းအပြင် ကျောက်ဖြူမြို့နယ်၊ ဓညဝတီရေတပ်ဌာနချုပ်အနီး ဦးကင်းကျေးရွာကိုလည်း စစ်ကောင်စီက ဂျက်တိုက်လေယာဥ်ဖြင့် ဗုံးကြဲချတိုက်ခိုက်ခဲ့သည့်အတွက် ပြည်သူ ၄ ထက်မနည်း သေဆုံးခဲ့သည်ဟု သတင်းရင်းမြစ်က AB News သို့ပြော သည်။
‘’ ကျောက်ဖြူမှာ မနေ့က ဗုံးကြဲတယ်။ ဓညဝတီရေတပ် ရေတပ်ဌာနချုပ်နဲ့ နီးတဲ့ ဦးကင်း ကျေးရွာမှာ ကျတယ်။ ပြည်သူ ၄ ယောက်ထက်မနည်း သေသွားတယ်ကြားတယ်။ ဒဏ်ရာရတာတွေလည်း များတယ်လို့သိထားပါတယ်’’ ဟု ဆိုသည်။
လက်ရှိတွင် အကြမ်းဖက်စစ်ကောင်စီတပ်သည် တိုက်ပွဲဖြစ်ပွားခြင်းမရှိသည့် နေရာများအပြင် တိုက်ပွဲဖြစ်ပွားသည့် နေရာ၏ အနီးဝန်းကျင်များကိုလည်း လေကြောင်း တိုက်ခိုက်မှုများ အပြင်းအထန် ဆက်တိုင်းပြုလုပ်လာသည့်အတွက် အာရက္ခပြည့်သူတော်လှန်းရေးအစိုးရမှ လေကြောင်းအန္တရာယ် သတိထား နေထိုင်ကြရန် သတိပေးထားသည်။