AB News – ဒီဇင်ဘာ ၁၂၊ ၂၀၂၃
ရက္ခိုင်ပြည်၊ ပုဏ္ဏားကျွန်းမြို့နယ် စပါးထားကျေးရွာတွင် စစ်ကောင်စီ၏ လက်နက်ကြီးကျည်စ ထိမှန်၍ ကလေးငယ် ၂ ဦးဒဏ်ရာရရှိသွားခဲ့ကြောင်း AB News မှ ထောက်လှမ်းသိရသည်။
ဒဏ်ရာ ရရှိသော ညီအစ်မနှစ်ဦးမှာ အဖ ဦးမောင်ခင်သန်း၏သမီး အသက် ၁၂ နှစ်အရွယ် အစ်မဖြစ်သူ မအေးအေးခိုင် နှင့် အသက် ၆ နှစ်အရွယ် ညီမဖြစ်သူ မအေးမြတ်နွယ်တို့ဖြစ်သည်။
ယနေ့ည ၈ နာရီ ၁၅ မိနစ်ခန့်တွင် အကြမ်းဖက် စစ်ကောင်စီအဖွဲ့ ပါဒလိတ်တပ်ရင်းမှ လက်နက်ကြီး ၁၀ ကျော်ထက်မနည်းပစ်ခတ်ခဲ့ရာ ဦးမောင်ခင်သန်းအိမ်ရှေ့သို့ ကျရောက်ပေါက်ကွဲပြီး ဗုံးခိုကျင်းတွင်းအဝ၌ ဖုန်းကြည့်နေသော ညီအစ်မ ကလေးငယ် ၂ ဦးထံ ကျည်စထိမှန်သွားခဲ့သည်ဟု ရွာခံသားတစ်ဦးက AB News သို့ ပြောသည်။
” လက်နက်ကြီးက အိမ်ရှေ့မှာ ကျပါတယ်၊ အမေနဲ့အဖေက ဗုံးခိုကျင်းထဲမှာ ဝင်ပုန်းနေကြတယ်၊ သမီး ၂ ဦးကတော့ ဗုံးခိုကျင်းဝမှာ ဖုန်းကြည့်နေကြတယ်၊ အိမ်ရှေ့က ကျည်စက သူတို့ ဆီမှာ ထိ သွားတယ်” ဟု ဆိုသည်။
မအေးအေးခိုင်သည် ၅ တန်းကျောင်းသူဖြစ်ပြီး မအေးမြတ်နွယ်မှာ Kg တန်းကျောင်းသူဖြစ်သည်။
အစ်မဖြစ်သူတွင် လက်မောင်း၌ ဒဏ်ရာပြင်းထန် ရရှိခဲ့ပြီး ညီမဖြစ်သူတွင် မျက်ခမ်းအောက်တွင် ထိခိုက်ဒဏ်ရာအနည်းငယ်ရရှိသွားခဲ့ကြောင်း တွေ့ရသည်။
၎င်းဒဏ်ရာများအား ရပ်ရွာမှ ဆေးဆရာတစ်ဦးနှင့် ဆေးကုသနေသော်လည်း ဗုံးစထုတ်မရသေးကြောင်း သိရသည်။
ထို့အပြင် အိမ်၏သွမ်မိုးတစ်ချို့လည်း ကျည်စထိမှန်ခဲ့ကြောင်း တွေ့ရသည်။
အကြမ်းဖက် စစ်ကောင်စီ၏ လက်နက်ကြီးပစ်ကူမှူကြောင့် ရက္ခိုင်ပြည် မြို့နယ် အများအပြားတွင် သေဆုံးသူ ၄၀ ကျော်ထိရှိလာခဲ့ပြီး ဒဏ်ရာရရှိသူ ၆၀ ကျော် ရှိလာနေကြောင်း သိရသည်။