AB News – နိုဝင်ဘာ ၂၆၊ ၂၀၂၃
ရက္ခိုင်ပြည်၊ ပုဏ္ဏားကျွန်းမြို့နယ် ကျောက်ဆိပ်ရွာတွင် စစ်ကောင်စီ ရေတပ်နေဗီမှ ပစ်ခတ်သောလက်နက်ကြီးကျည်ကြောင့်ဒေသအခေါ် ( ဖောင်တော် ) ဆိပ်ကမ်းအနီးရှိ ဘုတ်တစ်စီး မီးလောင်သွားကြောင်း AB News က စုံစမ်းသိရှိရသည်။
စကစ တို့သည် ယနေ့ နိုဝင်ဘာ ၂၆ ရက်နေ့ ညနေ ၄ နာရီကျော်တွင် ရေတပ်နေဗီမှ ၎င်းရွာသို့ ပစ်ခတ်သည့်အတွက် ဘုတ်တစ်စီးမီးလောင်မှု ဖြစ်ပွားခဲ့ကြောင်း ဒေသခံတစ်ဦးက AB News သို့ ပြောသည်။
” ၄ နာရီလောက်မှာ စကစတွေက နေဗီကလှမ်းပစ်တာပါ ၊ ဘုတ်တစ်စီးမှာထိသွားပြီး မီးလောင်နေပါတယ်” ဟု ဆိုသည်။
ထိုဘုတ်မှာ ကျောက်ဆိပ်ရွာမှ ဘုတ်ဖြစ်ပြီး ရဲထူးပိုင်ဆိုင်သည်ဟု သိရှိရသော်လည်း AB News က သီးခြားအတည်မပြုနိုင်သေးပေ။
အဆိုပါဘုတ်ကိုလည်း ပြုလုပ်ရန်အတွက် ကုန်းပေါ်တွင်တင်ထားသည့် ဘုတ်ဖြစ်သည်ဟု ဒေသခံများကပြောသည်။
ထို့အပြင် မီးလောင်နေသောဘုတ်ကို ရွာသားတစ်ချို့ မီးငြိမ်းသတ်ရန်သွားနေကြောင်း သိရသည်။
ယနေ့တွင်လည်း စစ်ကောင်စီမှ ဒရုန်းဖြင့်ဗုံးကြဲချမှုကြောင့် ခမောင်းတောရွာမှ အမျိုးသမီးတစ်ဦး၏ ဘယ်ဖက်မျက်လုံး ၁ လုံးကန်းသွားပြီး၊ ရဲရိုးပြင်ရွာမှ အမျိုးသားတစ်ဦးတွင်လည်း ထိခိုက်ဒဏ်ရာ ရရှိခဲ့ကြောင်း တွေ့ရသည်။
စစ်ကောင်စီသည် အပြစ်မဲ့ပြည်သူများကို ဦးတည်ပစ်ခတ်လာမှုကြောင့် ဒေသခံပြည်သူ သောင်းနှင့်ချီ ထွက်ပြေးနေကြရသည်။
ရွာသားများမှ ဘေးလွတ်ရွာသို့ ထွက်ပြေး တိမ်းရှောင်နေကြရကြောင်း သိရသည်။