( ဘုန်းကြီးကျောင်းဆောင်တစ်ခြမ်း ပျက်စီးသွား )
AB News – ဒီဇင်ဘာ ၅၊ ၂၀၂၃
ချင်းပြည်နယ်၊ ပလက်ဝမြို့နယ် တရွန်အိုင်ဗျူဟာအနီးသို့အကြမ်းဖက် စကစ အဖွဲ့မှ ရဟတ်ယာဥ် ၁ စီးဖြင့် ဗုံးကြဲချခဲ့သည့်အတွက် ဒေသခံ ၂ ဦးပြင်းထန်ဒဏ်ရာရရှိခဲ့ပြီး ဘုန်းကြီးကျောင်းဆောင်တစ်ခြမ်း ပျက်စီးသွားခဲ့ကြောင်း AB News မှ စုံစမ်းသိရှိရသည်။
ဒဏ်ရာရရှိသူများမှာ စက်ပိုက်ပြင်ရွာမှ အသက် ၄၆ နှစ်အရွယ် ဦးသန်းမောင် နှင့် ဇာတိကိုင်းရွာမှ စစ်ဘေးရှောင်နေသော အမည်မသိအမျိုးသားတစ်ဦးဖြစ်ကြောင်းသိရသည်။
အကြမ်းဖက် စကစ အဖွဲ့သည် ယမန်နေ့ ဒီဇင်ဘာလ ၄ ရက်နေ့ ည ၁၁ နာရီ ၅၀ မိနစ်တွင် ရဟတ်ယာဥ်ဖြင့် ဗုံး ၆ လုံးကြဲချခဲ့ရာ စက်ပိုက်ပြင်ရွာမှ လူ ၂ ဦး ကျည်စ ထိမှန်သွားခဲ့ကြောင်း ဒေသခံတစ်ဦးက AB News သို့ ပြောသည်။
” ၁၂ နာရီ ထိုးခါနီးပါပြီ၊ ရဟတ်ယာဥ် ၁ စီးနဲ့ ဗုံး ၆ လုံးကြဲချတယ်၊ ရွာထဲမှာ တစ်လုံးကျပြီး ပြင်းထန်ဒဏ်ရာရရှိသွားပါတယ်” ဟု ဆိုသည်။
၎င်းရွာအနီးတွင်တိုက်ပွဲ ဖြစ်ပွားခြင်းမရှိဘဲ အကြမ်းဖက် စစ်ကောင်စီအဖွဲ့ မှ ရည်ရွယ်ချက်ရှိရှိ ဗုံးကြဲချသွားခဲ့ကြောင်း ဒေသခံများ ပြောပြချက်အရ သိရသည်။
ဦးသန်းမောင်၏ ရင်ဘတ်တွင် ကျည်စထိမှန် ဒဏ်ရာကြောင့် အသက်ရှုပ်ကြပ်လျက်ရှိနေပြီး နီးစပ်သည့်ဆေးခန်းတစ်ခုတွင် ဆေးကုသမှုခံယူနေရကြောင်း သိရသည်။
ဘုန်းကြီးကျောင်းဆောင်အနီးတွင် ၅ လုံးပေါက်ကွဲခဲ့သည့်အတွက် ကျောင်းဆောင်တစ်ခြမ်းပျက်စီးသွားခဲ့ကာ မီတာ ၅၀ အကွာအဝေး၌ ရှိသော အမည်မသိ အမျိုးသားတစ်ဦး ကျည်စထိမှန်သွားခဲ့သည်။
တရွန်အိုင်ဗျူးဟာကုန်းကို ရက္ခိုင့်တပ်တော်မှ အပြီးသတ်သိမ်းပိုက်နိုင်ခဲ့ပြီးကြောင်းလည်း ဒေသခံများပြောပြချက်အရ သိရသည်။
အထိနာနေသော အကြမ်းဖက် စကစအဖွဲ့တို့သည် ရက္ခိုင်ပြည်တွင်းရှိ မြို့ရွာများသို့ ဗုံးကြဲချပြီး (Genocide )အစုလိုက် အပြုံလိုက် ရည်ရွယ်ချက်ရှိရှိသတ်နေခြင်း၊ စစ်ဘေးရှောင်စခန်းများသို့ လက်နက်ကြီးများဖြင့် လှမ်းပစ်နေခြင်း၊ ရပ်ရွာများသို့ဝင်ရောက်ပြီး မီးရှိူ့ခြင်း နှင့် အပြစ်မဲ့ပြည်သူများကို ပုဒ်မအမျိုးမျိုးတပ်ပြီး ဖမ်းဆီးထောင်ချနေခြင်းများကို ဆက်တိုက်ပြုလုပ်လျက်ရှိနေသည်။