AB News – ဧပြီ ၂ ၊ ၂၀၂၅
စစ်ကိုင်းတိုင်း၊ အင်းတော်မြို့ရှိ ဘုန်းကြီးကျောင်းကို တိုက်ပွဲဖြစ်ပွားခြင်းမရှိဘဲ အကြမ်းဖက်စစ်ကောင်စီအဖွဲ့မှ လေယာဉ်ဖြင့် ဗုံးကြဲ တိုက်ခိုက်ခဲ့သည့်အတွက် အရပ်သား ပြည်သူ ၂ ဦးသေဆုံးပြီး ၈ဦးထိခိုက်ဒဏ်ရာရရှိခဲ့သည်ဟု သိရသည်။
ယမန်နေ့ ဧပြီလ ၁ ရက်နေ့ နေ့လယ် ၁၂ နာရီ ၃၀ မိနစ်ခန့်က အင်းတော်မြို့ ရှိ မြို့မဘုန်းကြီးကျောင်းကို အကြမ်းဖက် စစ်ကောင်စီအဖွဲ့က တိုက်ပွဲဖြစ်ပွားခြင်းမရှိဘဲ လေယာဉ်ဖြင့် ဗုံးကြဲ တိုက်ခိုက်ခဲ့ခြင်းဖြစ်ကြောင်း သိရသည်။
အဆိုပါလေကြောင်းတိုက်ခိုက်မှုအတွင်း အရပ်သား ပြည်သူ ၂ ဦး သေဆုံးခဲ့ပြီး ၈ ဦးထိခိုက်ဒဏ်ရာရရှိခဲ့ကာ ရပ်တော်မူဘုရားတစ်ဆူလည်း ဗုံးစထိမှန်၍ အနည်းငယ်ပျက်စီးသွားခဲ့သည်ဟု သိရှိရသည်။
အလားတူ ကရင်ပြည်နယ်၊ ကျုံဒိုးမြို့နယ်ရှိ ကျေးရွာများကိုလည်း စစ်ကောင်စီအဖွဲ့က တိုက်ပွဲဖြစ်ပွားခြင်းမရှိဘဲ လက်နက်ကြီးများဖြင့် ပစ်ခတ် တိုက်ခိုက်ခြင်းကြောင့် ပြည်သူ ၁ ဦး သေဆုံးခဲ့သည်ဟု KNU ဗဟိုက ပြောဆိုထားသည်။
ယင်းအပြင် ဧပြီလ ၁ ရက်နေ့ ညနေ ၅ နာရီ ၃၀ မိနစ်ခန့်တွင်လည်း ကျုံဒိုးမြို့နယ်၊ ဝိဇ္ဇာကုန်း ကျေးရွာအတွင်းကို တိုက်ပွဲဖြစ်ပွားခြင်းမရှိဘဲ အကြမ်းဖက် စစ်ကောင်စီမှ က ၁၂၀ မမ လက်နက်ကြီး ၅ လုံးဖြင့် ပစ်ခတ် တိုက်ခိုက်ခဲ့ကြောင်း သိရသည်။
စစ်ကောင်စီအဖွဲ့မှ ပစ်ခတ်လိုက်သော လက်နက်ကြီးကျဉ် ပေါက်ကွဲသံကြောင့် ဝိဇ္ဇာကုန်းကျေးရွာတွင် နေထိုင်သည့် အသက် ၅၇ နှစ် အရွယ် သက်ကြီးပိုင်းအမျိုးသမီး ၁ ဦး နှလုံးဖောက်ကာ နောက်ပြန်လဲပြီး အုပ်ခုံနှင့် နှောက်စေ့ ထိမိကာ သေဆုံးခဲ့ကြောင်း သိရှိရသည်။
နိုင်ငံအတွင်း မတ်လ ၂၈ ရက်နေ့က အင်အားပြင်း ငလျင်လှုပ်ခတ်ခဲ့ခြင်းကြောင့် ပြည်သူအများအပြား ဝမ်းနည်းကြေကွဲနေချိန် စစ်ကောင်စီသည် တိုက်ပွဲဖြစ်ပွားခြင်းမရှိသော တိုင်းနှင့် ပြည်နယ်အချို့ကို လေကြောင်းတိုက်ခိုက်မှုများနှင့် လက်နက်ကြီးပစ်ခတ်မှုဆက်တိုင်းပြုလုပ်လျက်ရှိသည်ကို တွေ့ရှိရသည်။