AB News – ဧပြီ ၂၅၊ ၂၀၂၅
ရက္ခိုင်ပြည်၊ ကျောက်ဖြူမြို့နယ်၊ ရေနံတောင်ကျေးရွာတွင် အကြမ်းဖက်စစ်ကောင်စီ၏ ဒရုန်းဖြင့် ဗုံးကြဲတိုက်ခိုက်မှု သုံးကြိမ် ဖြစ်ပွားခဲ့ရာ စစ်ဘေးရှောင်ပြည်သူ ၁ ဦး သေဆုံးပြီး ၁ ဦး ဒဏ်ရာရရှိခဲ့ကြောင်း သတင်းရရှိသည်။
အကြမ်းဖက်စစ်ကောင်စီသည် ယမန်နေ့ နေ့လယ် ၂ နာရီ ၅၆ မိနစ်၊ ၃ နာရီ ၅ မိနစ်နှင့် ၃ နာရီ ၁၄ မိနစ်တို့တွင် ဒရုန်းဖြင့် သုံးကြိမ်တိုင် ဗုံးကြဲတိုက်ခိုက်ခဲ့သည်။
သေဆုံးသူမှာ ကုလားဘာကျေးရွာမှ ရေနံတောင်ကျေးရွာသို့ စစ်ဘေးရှောင်လာသူ အသက် ၆၂ နှစ်အရွယ် ဒေါ်မယဉ်နု ဖြစ်သည်။ ၎င်းသည် ဗုံးစထိမှန်ဒဏ်ရာကြောင့် ဆေးကုသမှုခံယူရန် သွားရောက်စဉ် ဒဏ်ရာပြင်းထန်မှုကြောင့် သေဆုံးခဲ့ခြင်းဖြစ်သည်။
ဗုံးကြဲတိုက်ခိုက်မှုကြောင့် ကျရောက်ပေါက်ကွဲခဲ့သည့် ဗုံးသီး ၁ လုံးသည် ဦးလှစံ၏ နေအိမ်ရှေ့ရှိ ဈေးဆိုင်အနီးတွင် ဖြစ်ပွားခဲ့ပြီး ဦးလှစံနှင့် ၎င်း၏နေအိမ်တွင် စစ်ဘေးရှောင်နေထိုင်သည့် ဒေါ်မယဉ်နုတို့ ဗုံးစထိမှန်ကာ ပြင်းထန်သော ဒဏ်ရာများ ရရှိခဲ့ကြောင်း မိသားစုဝင် တစ်ဦးက AB News သို့ ပြောသည်။
“မနေ့က နေ့လယ်ပိုင်းမှာ ဒရုန်းနဲ့ ၃ကြိမ်တောင် ဗုံးလာကြဲတယ်။ လူတွေအားလုံး ကြောက်လန့်ပြီး ပုန်းအောင်းနေကြရတယ်။ ဗုံးသီး ၁ လုံးက ဦးလှစံရဲ့ နေအိမ်ရှေ့က ဈေးဆိုင်မှာ ပေါက်ကွဲသွားတာကြောင့် ဦးလှစံနဲ့ သူ့ဆီမှာ စစ်ဘေးရှောင်နေတဲ့ မယဉ်နုတို့ ပြင်းထန်တဲ့ ဒဏ်ရာတွေ ရသွားတယ်။ မယဉ်နုကတော့ ဒဏ်ရာအရမ်းပြင်းထန်လို့ ဆေးရုံကို သွားတဲ့လမ်းမှာပဲ ဆုံးသွားရှာတယ်” ဟု ဆိုသည်။
လက်ရှိတွင် ဗုံးစထိမှန်ဒဏ်ရာရရှိထားသည့် ဦးလှစံသည် အနီးအနားရှိ ဆေးခန်းတွင် ဆေးကုသမှု ခံယူလျက်ရှိကြောင်း သိရသည်။
ထို့ပြင် ကျန်ရှိသည့် ဗုံးသီး ၂ လုံးသည် ရေနံတောင်ကျေးရွာမှ ဒေါ်အောင်နုမ၏ နေအိမ်ရှေ့တွင် ကျရောက်ပေါက်ကွဲခဲ့ရာ အနီးရှိ မုန့်ဆိုင် ၁ဆိုင် မီးလောင်ပျက်စီးခဲ့ပြီး ဗုံးစထိမှန်မှုကြောင့် အိမ်အချို့လည်း ပျက်စီးခဲ့ကြောင်း သိရသည်။
အကြမ်းဖက်စစ်ကောင်စီသည် တိုးမြှင့်အပစ်အခတ်ရပ်စဲရေး ကြေညာပြီးနောက် ရက္ခိုင် နှင့် ရှမ်းပြည်နယ်မြောက်ပိုင်းတို့တွင် လေကြောင်းမှ ဗုံးကြဲတိုက်ခိုက်မှုများကို ပိုမိုလုပ်ဆောင်လျက်ရှိသည်။