၆၀ နှစ်ပြည့် သျှမ်းပြည်တပ်မတော်နေ့သို့ အာရက္ခတပ်တော် ဒုစစ်ဦးစီးချုပ် Dr ညိုတက်ရောက်ခဲ့ပြီး ဂုဏ်ပြုအမှာစကားပြောကြားခဲ့သည်ဟု သိရသည်။
သျှမ်းပြည်တပ်မတော်ကို ၁၉၆၄ ခုနှစ်တွင် စတင်ဖွဲ့စည်းခဲ့ပြီး ယနေ့ဧပြီလ ၂၄ ရက်နေ့သည် SSA ၏ ၆၀ နှစ်ပြည့် တပ်မတော်နေ့ဖြစ်သည်။
အဆိုပါအခမ်းအနားသို့( SSPP/SSA) ဥက္ကဌ ဗိုလ်ချုပ်ကြီး ပန်ဖနှင့်အတူ အာရက္ခတပ်တော်၏ ဒုစစ်ဦးစီးချုပ် Dr ညိုထွန်းအောင် တက်ရောက်ကာ ဂုဏ်ပြုအမှာစကားပြောကြားခဲ့ခြင်းဖြစ်သည်။
“၂၀၂၁ အာဏာသိမ်းမှုနောက်ပိုင်း အပြောင်းအလဲ ရှိခဲ့သလို ၂၀၂၃ က ၁၀၂၇ စစ်ဆင်ရေးကာလ အပြီးမှာလည်း စစ်ရေး၊ နိုင်ငံရေး အပြောင်းအလဲတွေ အများကြီး ရှိခဲ့ပါတယ်။ ပြောင်းလဲလာတဲ့ နိုင်ငံရေး ရေစီးကြောင်းနဲ့အတူ ကိုယ့်လူမျိုး၊ ကိုယ့်ဒေသအတွက် အကျိုးဖြစ်ထွန်းတဲ့ အခြေအနေ အချိန်အခါ ပေါ်မှာ မူတည်ပြီး SSPP/SSA နဲ့ သျှမ်းပြည်သူလူထုအနေနဲ့ အဖွဲ့အစည်းရဲ့ ရည်မှန်းချက်တွေ ဒီထက်ပိုပြီးမှပဲ ပြည့်ဝနိုင်ပါစေ” ဟု Dr ညိုထွန်းအောင်က ဂုဏ်ပြုအမှာစကားတွင် ပြောကြားသွားခဲ့သည်။
သျှမ်းပြည်တိုးတက်ရေးပါတီ/ သျှမ်းပြည်တပ်မတော် ( SSPP/ SSA) နေ့ကိုဌာနချုပ်တည်ရှိသည့် ကျေးသီးမြို့နယ်၊ ဝမ်ဟိုင်းတွင် ကျင်းပခဲ့ကြောင်း သိရသည်။
ရက္ခိုင်အမျိုးသားအဖွဲ့ချုပ် ( ULA/AA) ၏ ဂုဏ်ထူးဆောင်တံဆိပ်ကိုလည်း SSPP/SSA ဉက္ကဋ္ဌ ဗိုလ်ချုပ်ကြီး ပန်ဖ အား Dr ညိုထွန်းအောင်က ချီးမြှင့်ပေးအပ်ခဲ့ကြောင်း သိရသည်။