AB News – အောက်တိုဘာ ၃၀၊ ၂၀၂၅
ချန်ဒြာ
ရက္ခိုင်-ဘင်္ဂလား နယ်စပ်ရှိ အာရက္ခပင်လယ်ပြင်အတွင်းသို့ ပြည်ပငါးဖမ်းရေယာဉ်များ လာရောက်လုပ်ကိုင်မည်ဆိုပါက အာရက္ခပြည်သူ့တော်လှန်ရေးအစိုးရ၏ ပြည်ပ ငါးဖမ်းရေယာဉ် စီမံခန့်ခွဲရေးဌာနတွင် ငါးဖမ်းခွင့် မှတ်ပုံတင်ရမည်ဖြစ်ပြီး တရားဝင်အခွန်အခများ ပေးဆောင်မှသာ ခွင့်ပြုမည်ဖြစ်ကြောင်း AB News က စုံစမ်းသိရှိရသည်။
သို့သော် တရားဝင်အခွန် မဆောင်ဘဲ ခိုးဝင်ငါးဖမ်းသည့် ပြည်ပမှ ငါးဖမ်းဘုတ်များနှင့် အခွန်ထက်ဝက်သာ ဆောင်ထားပြီး သတ်မှတ်ထားသည့်အချိန်အတွင်း အပြည့်အဝပေးဆောင်ရန် ပျက်ကွက်သည့် ရေယာဉ်များကို အာရက္ခပြည်သူ့တော်လှန်ရေးအစိုး၏ ကမ်းရိုးတန်းလုံခြုံရေးတပ်ဖွဲ့က ဖမ်းဆီးစစ်ဆေးကာ တရားဥပဒေနှင့်အညီ အရေးယူမှုများ ဆက်တိုက်ပြုလုပ်လျက်ရှိသည်။
ယမန်နေ့ အောက်တိုဘာလ ၂၉ ရက်နေ့တွင် အာရက္ခရေပိုင်နက်၊ မောင်တောမြို့နယ်၊ ဧကရာဇ်ရွာ၏ အနောက်ဘက် ကမ်းရိုးတန်းနှင့် ၂.၁၅ ကီလိုမီတာကျော်အကွာခန့်၌ တရားဝင်အခွန်ဆောင်ထားခြင်းမရှိဘဲ ငါးခိုးဖမ်းနေသည့် ဘင်္ဂလားဒေ့ရှ်နိုင်ငံမှ ရေလုပ်သား ၇ ဦးပါ ငါးဖမ်းဘုတ် ၁ စီးကို ကမ်းရိုးတန်းလုံခြုံရေးတပ်ဖွဲ့က ဖမ်းဆီး အရေးယူခဲ့သည်။
ထို့အတူ အောက်တိုဘာလ ၂၇ ရက်နေ့၊ နံနက် ၆ နာရီ ၅၅ မိနစ်အချိန်ခန့်တွင်လည်း အာရက္ခပင်လယ်ပြင်အတွင်း တရားမဝင် ခိုးဝင်ငါးဖမ်းသည့် ဘင်္ဂလားဒေ့ရှ်ငါးဖမ်းဘုတ်များကို လိုက်လံဖမ်းဆီးရာ အဖမ်းမခံဘဲ ထွက်ပြေးမှုများရှိခဲ့သည်။
ယင်းနောက် နံနက် ၈ နာရီအချိန်တွင် ရေလုပ်သား ၄ ဦးပါသည့် ငါးဖမ်းဘုတ် ၁ စီးကို ထပ်မံဖမ်းဆီးရရှိခဲ့သည်။
စက်တင်ဘာလ ၃၀ ရက်နေ့တွင်လည်း ပြည်ပငါးဖမ်းရေယာဉ် စီမံခန့်ခွဲရေးဌာနတွင် မှတ်ပုံတင်ထားသော်လည်း အခွန်ငွေအပြည့်အဝ ပေးဆောင်ထားခြင်းမရှိသည့် ငါးဖမ်းဘုတ်များနှင့် ခွင့်မပြုသေးသော နေရာများတွင် ဝင်ရောက်ငါးခိုးဖမ်းသည့် ဘင်္ဂလားဒေ့ရှ်နိုင်ငံသားပိုင် ငါးဖမ်းဘုတ်များကို AA က ဖမ်းဆီးခဲ့သည်။
ရေလုပ်သား ၇ ဦးပါ ငါးဖမ်းဘုတ် ၁ စီးကို ဖမ်းဆီးစစ်ဆေးပြီးနောက် အောက်တိုဘာလ ၁ ရက်နေ့တွင် ငါးဖမ်းပိုက်နှင့် ငါးများကို သိမ်းယူကာ နောက်ဆုံးအကြိမ်သတိပေး၍ ပြန်လွှတ်ပေးခဲ့ကြောင်း သိရသည်။
ဒေသခံရေလုပ်သားတစ်ဦးက “ပင်လယ်မှာတော့ ငါးဖမ်းခွင့်မှတ်ပုံတင်ပြီး ငါးဖမ်းတဲ့ ပြည်ပဘက်က ဘုတ်တွေရှိသလို၊ မှတ်ပုံတင်ခြင်းမရှိပဲ ငါးခိုးဖမ်းတဲ့ ဘုတ်တွေလည်း အများကြီးရှိပါတယ်။ ကျနော်တို့အစိုးရကလည်း ငါးခိုးဖမ်းတဲ့ဘုတ်တွေကို လိုက်လံဖမ်းဆီးနေပါတယ်။ ပြည်တွင်းဘက်က ငါးဖမ်းဘုတ်တွေကတော့ အခွန်ဆောင်စရာမလိုပါဘူး” ဟု ဆိုသည်။
လက်ရှိအချိန်အထိ အာရက္ခပြည်သူ့တော်လှန်ရေးအစိုးရ၏ ကမ်းရိုးတန်းလုံခြုံရေးတပ်ဖွဲ့သည် တရားမဝင် လာရောက်ငါးခိုးဖမ်းသည့် ပြည်ပမှ ငါးဖမ်းဘုတ်များကို နေ့စဥ်လိုက်လံဖမ်းဆီးကာ အရေးယူဆောင်ရွက်မှုများ ဆက်လက် ပြုလုပ်လျက်ရှိကြောင်း သိရသည်။