AB News – သြဂုတ် ၁၊ ၂၀၂၅
ဒေဝီ
အာရက္ခဒေသတွင် ဇူလိုင်လအတွင်း ရေနစ်သေဆုံးသူ ၁၀ ဦးအထိ ရှိခဲ့ကြောင်း AB News ၏ သတင်းစစ်တမ်းအရ သိရသည်။
အဆိုပါရေနစ်သေဆုံးသူများတွင် အမျိုးသမီး ၄ ဦး နှင့် အမျိုးသား ၆ ဦးတို့ရေနစ်သေဆုံးခဲ့ကြပြီး ၎င်းတို့မှာ အမ်းမြို့နယ် ၂ ဦး၊ သံတွဲမြို့နယ် ၁ ဦး၊ မောင်တောမြို့နယ် ၂ ဦး၊ မင်းပြားမြို့နယ် ၁ ဦး၊ မြေပုံမြို့နယ် ၁ ဦး၊ ရသေ့တောင်မြို့နယ် ၁ ဦး နှင့် ပလက်ဝမြို့နယ် ၂ ဦး တို့ ဖြစ်ကြသည်။
ပြီးခဲ့သည့် ဇူလိုင် ၁ ရက်နေ့က မောင်တော မြို့နယ်၊ အောင်သုခကျေးရွာရှိ အသက် ၃၇နှစ်အရွယ် မအေးအေးသန်း နှင့် ၎င်း၏ အဖော် အသက် ၂၈ နှစ်အရွယ် မယောင်းချေတို့မှာ ခင်ပွန်းဖြစ်သူထံ ထမင်းပို့ရန် သဝင်ချောင်း ကို ဖြတ်ကူးစဉ် ရေနစ်သေဆုံးခဲ့သည်။
အလားတူ ပြီးခဲ့သည့် ဇူလိုင် ၇ ရက်နေ့ကလည်း သံတွဲမြို့နယ်၊ကင်သည်ကျွန်းရွာက အသက် ၁၆ နှစ် အရွယ် မောင်ထင်လင်းကျော်သည် ၎င်း၏ သူငယ်ချင်း ၆ ဦးနှင့်အတူ သံတွဲချောင်းအထက်ပိုင်း ကျောက်ဘူးတောင် ဘုရားအနီးရှိ ချောင်းစပ်တွင် ရေဆင်းကူးရာမှ ရေစီးဖြင့်မျောပါပြီး ရေနစ်သေဆုံးခဲ့ရသည်။
ထို့ပြင် ပြီးခဲ့သည့် ဇူလိုင်လ ၈ ရက်နေ့တွင်လည်း မင်းပြားမြို့နယ်၊ ခေါင်းလောင်းကျေးရွာမှ အဖ ဦးမောင်စောလှ၊ အမိ ဒေါ်စိန်ကျော့ဖြူတို၏ သား အသက် ၂၉ နှစ်အရွယ် မောင်နိုင်လင်းဌေးသည် ပျောက်ဆုံးသွားခဲ့ပြီး ဇူလိုင် ၁၀ရက်နေ့တွင် ဇီးကိုင်းချောင်း၌ ရေနစ်သေဆုံးလျက်တွေ့ရှိခဲ့ကြောင်း သိရသည်။
ယင်းအပြင် ဇူလိုင် ၁၃ ရက်နေ့ မနက်ပိုင်းက အမ်းမြို့နယ်၊တပ်တောင်မြို့၊ အဝပြင်ရွာ (၂) ရွာရှိ အသက် ၁၆ နှစ် အရွယ် မဆုမြတ်လှိုင် (ခ) ပိစိ နှင့် အသက် ၁၂ နှစ်အရွယ် မဆုသက်လှိုင် (ခ) စုစုမ တို့သည် မှိုဟင်းခူး သွားရာမှ ရေနစ်သေဆုံးခဲ့ရသည်။
ပြီးခဲ့သည့် ဇူလိုင် ၁၉ ရက်နေ့ကလည်း ရသေ့တောင်မြို့နယ်၊ ကျွန်းပေါ်ပေါက်တောရွာက အသက် ၄၅ နှစ်အရွယ် ဦးမောင်သန်းဦးသည် ကျွန်းပေါ် ပေါက်တောရွာမှ ခွဆုံရွာသို့ ချောင်းဖြတ်ကူးနေစဥ် ရေစီးသန်သဖြင့် ရေနစ်သေဆုံးခဲ့ရသည်။
အလားတူ ဇူလိုင်လ ၂၃ ရက်နေ့က ပလက်ဝမြို့နယ်၊ မွေလိုက်ဝကျေးရွာတွင် အသက် ၆၁ နှစ်အရွယ် ဦးလှထွန်းဖြူသည် ကုလက်ချောင်းအတိုင်း မျောပါ လာသည့် စက်လှေတစ်စီးကို ဆယ်ယူရာမှ ရေစီးဖြင့် မျောပါသွားပြီး ၃ ရက်အကြာတွင် ရုပ်အလောင်းကို ပြန်တွေ့ခဲ့ရသည်။
ထို့အပြင် ပြီးခဲ့သည့် ဇူလိုင် ၂၅ ရက်နေ့ကလည်း မြေပုံမြို့နယ်၊ တောင်စိုင်ရွာက အသက် ၄၈ နှစ်အရွယ် ဦးဦးသာကျော်သည် တောင်စိုင်ရွာ အနီးရှိ ၎င်းအငှားလုပ်ကိုင်နေသည့် ပုဇွန်တာသို့ ပိုက်တန်းသွားရာမှ ရေနစ်သေဆုံးသွားခဲ့ရသည်။
အလားတူ ပြီးခဲ့သည့် ဇူလိုင်၂၆ ရက်နေ့က ပလက်ဝမြို့နယ်၊ ရွှေလိုက်ဝကျေးရွာတွင် အသက် ၁၈ နှစ်အရွယ် ကျောင်းဆရာ မောင်ကိုဇာသည် ရာရီတောင်ကျေးရွာမှ ၎င်းနေထိုင်သည့် ရွှေလိုက်ဝကျေးရွာသို့အပြန်တွင် ရှင်းလက်ချောင်းကို ဖြတ်ကူးရာ ရွှေလိုက်ဝဆိပ်ကမ်းသို့ မရောက်ခင် ရေစီးသန်ပြီး မျောပါသွားဖြင့် ၎င်း၏ရုပ်အလောင်းကို ဇူလိုင် ၂၉ ရက်နေ့၊ မနက် ၈ နာရီဝန်းကျင်တွင် လေသစ်ကျေးရွာအနီးက ရှာတွေ့ခဲ့ကြောင်း သိရသည်။
ယခုနှစ်မိုးရာသီ ကာလအတွင်း အာရက္ခဒေသတွင် ရေနစ်သေဆုံးသူ ၂၂ ဦးထိ ရှိနေပြီဖြစ်ကြောင်း AB News ၏ စစ်တမ်းများအရ သိရသည်။
မိုးတွင်းကာလဖြစ်သည့်အတွက် အာရက္ခဒေသရှိ ရေကြီး ရေလျှံမှုများ မကြာခဏ ဖြစ်ပွားလေ့ရှိပြီး ရေစီးသန်သဖြင့် ရေလွှမ်းမိုးခြင်း ၊ တောင်ပြိုခြင်း၊ ကမ်းပါးပြိုခြင်းများကြောင့် အသက်အန္တရာယ် ထိခိုက်နိုင်သဖြင့် မြစ်ချောင်း၊ ကမ်းနားများတွင် သတိထားနေထိုင်သွားလာကြရန် အာရက္ခပြည်သူ့တော်လှန်ရေးအစိုးရ၊ ဒေသဆိုင်ရာအာဏာပိုင်များက ပြည်သူများကို သတိပေးနှိုးဆော်တိုက် တွန်းထားကြောင်း သိရသည်။