‎
‎
‎AB News – သြဂုတ် ၉၊ ၂၀၂၅
‎နွယ်စိုး
‎
‎စစ်ကောင်စီသည် မြန်မာနိုင်ငံအတွင်း ရာဇဝတ်မှုကြီးများကို ဖုံးကွယ်ဖျောက်ဖျက်ရန် အမေရိကန်လော်ဘီအဖွဲ့ DCI Group ကို ဒေါ်လာ ၃ သန်းဖြင့် ငှားရမ်းထားသည်ဟု Justice For Myanmar JFM က သြဂုတ်လ ၇ ရက်နေ့က ထုတ်ပြန်ခဲ့သည်။
‎
‎စစ်ကောင်စီ၏ ပြန်ကြားရေးဝန်ကြီးဌာနနှင့် အမေရိကန် လော်ဘီအဖွဲ့ DCI Groupတို့ သည် ဇူလိုင်လ ၃၁ ရက်က စတင်အသက်ဝင်မည့် စာချုပ်တစ်ရပ်ကိုချုပ်ဆိုခဲ့ခသည်ဟု Justice For Myanmar ၏ ထုတ်ပြန်ချက်တွင် ဖော်ပြထားသည်။
‎
‎စာချုပ်အတွင်း စစ်အုပ်စုမှ လော်ဘီအဖွဲ့ ငှားရမ်းကြေး တစ်နှစ်ဒေါ်လာ သုံးသန်းပေးရမည်ဖြစ်ပြီး လက်ရှိတွင် စစ်အုပ်စုဘက်က ဒေါ်လာ တစ်သန်းခွဲပေးချေထားပြီးဖြစ်ကြောင်း JFM က ထုတ်ပြန်ချက်က ဆိုသည်။
‎
‎မြန်မာစစ်အုပ်စုသည် အတုအယောင်ရွေးကောက်ပွဲမတိုင်မီ နိုင်ငံရေးတရားဝင်မှုရရှိရေး ကြိုးပမ်းသော အနေဖြင့် ၎င်းတို့ ကျူးလွန်ခဲ့သော ရာဇဝတ်မှုကြီးများကို ဖုံးကွယ်ဖျောက်ဖျက်နိုင်ဖို့နှင့် ပုံရိပ်ကောင်းရရှိအောင် ခဝါချရန်အတွက် DCI Group ကို ငှားရမ်းခဲ့ကြောင်း ဆိုထားသည်။
‎
‎ပထမအရစ်ကျ ငွေပေးချေမှုအဖြစ် အမေရိကန်ဒေါ်လာ ၁ဒသမ ၅ သန်းကို စစ်အုပ်စုက နိုင်ငံတော်စီမံအုပ်ချုပ်ရေးကောင်စီ (နစက) အား ဖျက်သိမ်းပြီး “နိုင်ငံတော်လုံခြုံရေးနှင့် အေးချမ်းသာယာရေးကော်မရှင်” ဟု အမည်ပြောင်းလဲခဲ့သောနေ့ ဇူလိုင် ၃၁ ရက်တွင် ပေးချေခဲ့ကြောင်း သိရသည်။
‎
‎စစ်အုပ်စုနှင့် DCI လော်ဘီ Group တို့၏ စာချုပ်ထဲမှာ “ကုန်သွယ်ရေး၊ သဘာဝသယံဇာတနှင့် လူသားချင်းစာနာမှုအကူအညီ” ဆိုင်ရာများမှာ အမေရိကန်ပြည်ထောင်စုနှင့် ဆက်ဆံရေး ပြန်လည်တည်ဆောက်ရန် ဖြစ်ကြောင်း ဆိုသည်။
‎
‎အဆိုပါစာချုပ်ကို DCI Group ၏ စီမံခန့်ခွဲမှုမိတ်ဖက် Justin Peterson နှင့် စစ်အုပ်စု၏ အမြဲတမ်းအတွင်းဝန် ဝင်းကျော်အောင် ကိုယ်စားပြုသည့် ပြန်ကြားရေးဝန်ကြီးဌာနတို့အကြား လက်မှတ်ရေးထိုးခဲ့ခြင်း ဖြစ်သည်။
‎
‎နိုင်ငံခြားကိုယ်စားလှယ် မှတ်ပုံတင်ရေး ဥပဒေစာရွက်စာတမ်းများတွင် DCI Groupနှင့် အဓိက ထိတွေ့ ဆက်ဆံမည့်သူအနေဖြင့် စစ်အုပ်စုပြန်ကြားရေးဝန်ကြီးဌာန၏ ဒုတိယအမြဲတမ်း အတွင်းဝန် မြင့်ကျော် ကို စာရင်းသွင်းထားသည်။
‎
‎မြင့်ကျော်သည့် စစ်အုပ်စု၏ ဝါဒဖြန့်ချိရေး “ပြန်ကြားရေးအဖွဲ့” တွင်လည်း အတွင်းရေးမှူး ဖြစ်ကြောင်း သိရသည်။
‎
‎DCI Group သည် ၂၀၀၂ ခုနှစ်ကလည်း ယခင်မြန်မာစစ်အုပ်စုနှင့် စာချုပ်တစ်ရပ် ရှိခဲ့ပြီး စစ်အုပ်စု၏ ပုံရိပ်ကို ခဝါချသန့်စင်ရေးနှင့် “နိုင်ငံရေးရင်ကြားစေ့ရေးအတွက် တွေ့ဆုံဆွေးနွေးရေး” လမ်းကြောင်းကို တွန်းတင်ရေးတို့ အတွက် အမေရိကန်အစိုးရအား လော်ဘီလုပ်ပေးခဲ့ကြောင်းဆိုသည်။
‎
‎စစ်အုပ်စု၏ ပြန်ကြားရေးဝန်ကြီးဌာနသည် ပြည်သူများအပေါ် စစ်အုပ်စုကျူးလွန်လျက်ရှိသည့် အကြမ်းဖက်စစ်ဆင်ရေး၏ အစိတ်အပိုင်းအဖြစ် သတင်းမှားများနှင့် အမုန်းစကားများကို ထုတ်လုပ်ဖြန့်ချီရာတွင် ပါဝင်ပတ်သက်ဆောင်ရွက်သည်။
‎
‎စစ်အုပ်စုအတွက် အားပေးကူညီသူအဖြစ် ထမ်းဆောင်ရန် ရွေးချယ်လိုက်သော DCI Group ၏ ဆုံးဖြတ်ချက်ကို ကန့်ကွက်ရှုတ်ချကြောင်းလည်း လူ့အခွင့်အရေး လေ့လာစောင့်ကြည့် ရေးအဖွဲ့ Justice For Myanmar က ထုတ်ပြန်ထားသည်။