AB News – ဧပြီ ၇ ၊ ၂၀၂၄
ရက္ခိုင်ပြည် မာန်အောင်မြို့နယ် သစ်ပုံရွာတွင် ရက္ခိုင့်တပ်တော် အလိုမရှိကြောင်း ဆိုင်းဘုတ်ကို နေအိမ်တိုင်းတွင် ကပ်ရမည်ဟု စစ်ကောင်စီပြောဆိုခဲ့ပြီး မကပ်လျှင် ရပ်ရွာအား ၂ နာရီအတွင်းဗုံးကြဲတိုက်ခိုက်မည်ဟု စစ်ကောင်စီက ဖိအားပေးခြိမ်းခြောက်ခဲ့ကြောင်း သိရသည်။
အကြမ်းဖက် စစ်ကောင်စီအဖွဲ့သည် ယနေ့ ဧပြီလ ၇ ရက်နေ့ နေ့လည် ၁ နာရီကျော်တွင် သစ်ပုံရွာသို့ဝင်လာပြီး ပြည်သူများကိုအစည်းအဝေးခေါ်ကာ ရက္ခိုင့်တပ်တော် အလိုမရှိ ဆိုင်းဘုတ် ကပ်ရမည်ဟု ပြောဆိုခဲ့ကြောင်း ဒေသခံတစ်ဦးက AB News သို့ ပြောသည်။
“စစ်ကောင်စီတပ်သားတွေကရွာထဲဝင်လာတယ်။ ဗိုလ် ၂ ယောက်ပါတယ်။ ရွာသားတွေကို အစည်းအဝေးခေါ်ပါတယ်။ “ရက္ခိုင့်တပ်တော် အလိုမရှိ” ဆိုတဲ့စာသားပါဆိုင်းဘုတ်တွေ မိမိကိုယ်တိုင်စာရေးပြီး အိမ်တိုင်းမှာကပ်ရမယ်။ မကပ်ရင်တော့ ဗုံးကြဲသွားမယ်လို့ ပြောပါတယ်” ဟုဆိုသည်။
ယမန်နေ့ကလည်း စစ်ကောင်စီက သစ်ပုံရွာမှ ဒေသခံ ၂၀ ဦးကိုစစ်မှုထမ်းရန်ခေါ်သည့်အတွက် စစ်ကောင်စီ၏ ခိုင်းတိုင်းလုပ်သည့် ကျေးရွာအုပ်ချုပ်ရေးမှူးအား စစ်ကောင်စီ၏ လုပ်ရပ်အား အလိုမရှိကြောင်း ရွာခံသားများက နေရာ ၃ ခုတွင် စာကပ်ကန့်ကွက် ထားခဲ့သည်ကို တွေ့ရသည်။
သစ်ပုံရွာ/သူရွာသားများသည် ၎င်းကန့်ကွက်စာကို ယမန်နေ့ နံနက် ၇ နာရီတွင် စျေးရှေ့ရှိ အလှူခံရာမဏ္ဍပ်ရှေ့တွင် ၁ ရွက်၊ စာကြည့်တိုက်ရှေ့ ကုက္ကိုပင်တွင် ၁ ရွက်နှင့် ရွာထဲ ခြံစည်းရိုးတွင် ၁ ရွက်ကပ်ထားခဲ့ကြောင်း သိရသည်။
ရွာသူ/ရွာသားများ၏ ကန့်ကွက်စာတွင်
( ၁ )သူခိုး/ ဓားပြတွေရဲ့ ရန်ကိုကာကွယ်ရမှာလည်းမဟုတ်။
( ၂ )ဒီရပ်၊ ဒီရွာမှာ အမျိုးသား သစ္စာဖောက်များရှိလို့ ရပ်ရွာကို ကြိုတင်ကာကွယ်ရမှာလည်းမဟုတ်။
( ၃) ပြည်ပမှ ကျူးကျော်လာသော ရန်သူများကို ဝိုင်းဝန်းတိုက်ထုတ်ရန်လည်းမဟုတ်။
( ၄) ရပ်ရွာတွင် လက်နက်ကိုင်ဆောင်ပြီး ရွာသူ/ သားများအပေါ် ခြိမ်းခြောက်အနိုင်ကျင့် ဗိုလ်ကျ၊ လုယက်၊ လူသတ်၊ မုဒိမ်းကျင့်အစရှိသူလည်းမရှိ ဘဲ ရွာစောင့်တပ်အား အလိုမရှိကြောင်း စာကပ်ကန့်ကွက်ထားသည်ကို တွေ့ရသည်။
ထို့အပြင် ရပ်ရွာအစည်းအဝေးလုပ်အဖွဲ့က တစ်ဖက်လက်နှင့် ရည်ရွယ်ချက်ရှိရှိ ခိုင်းတိုင်းလုပ် လူအင်အားလိုသလောက်ဖြည့်ပေးရလောက်အောင် မစင်စားပြီး အသိဉာဏ်နည်းတဲ့ လူတိရစ္ဆာန် တွေထဲ သစ်ပုံရွာသူ/သားများ ပါသလားဟု မေးခွန်းထုတ်ပြောဆိုထားသည်။
အထိနာ ကျဆုံးနေသောအကြမ်းဖက် စစ်ကောင်စီသည် စစ်မှုထမ်း ဥပဒေကိုခုတုံးလုပ်ကာ မာန်အောင်အတွင်းရှိ ကျေးရွာများအပါအဝင် တစ်ခြားမြို့နယ် များတွင်လည်း စစ်မှုထမ်းရန်ခေါ်ယူလျက်ရှိနေသည် တွေ့ရသည်။
မာန်အောင်တွင် ရက္ခိုင့်တပ်တော်နှင့် စစ်ကောင်စီအဖွဲ့တို့ကြား တိုက်ပွဲ ဖြစ်ပွားခြင်း မရှိသေးသော်လည်း စစ်ကောင်စီသည် မာန်အောင်မြို့ လေဆိပ်အပါအဝင် ခံတပ်များကို အခိုင်အမာပြုလုပ်ထားကြောင်းလည်း သိရသည်။
Website
www.arakanbaynews.com
Facebook
https://www.facebook.com/arakanbaynewsinfo?mibextid=ZbWKwL