AB News – စက်တင်ဘာ ၁၄ ၊ ၂၀၂၄
ပြည်သူ့လုံခြုံရေးနှင့် တရားဥပဒေစိုးမိုးရေးဌာနကိုဖွဲ့စည်းကာ တပ်ဖွဲ့ဝင်အသစ်များခေါ်ယူ၍ ဌာနကို တိုးချဲ့ဖွဲ့စည်းသွားမည်ဟု AA က ယနေ့စက်တင်ဘာ ၁၃ ရက်နေ့တွင် အသိပေးထုတ်ပြန်လိုက်သည်။
ထုတ်ပြန်ချက်တွင် “အာရက္ခပြည်သူ့တော်လှန်ရေးအစိုးရသည် ပြည်သူ့လုံခြုံရေးနှင့် တရားဥပဒေစိုးမိုးရေးအတွက် Department of Law Enforcement and Public Security (DLEPS) ပြည်သူ့လုံခြုံရေးနှင့် တရားဥပဒေစိုးမိုးရေးဌာနကို ဖွဲ့စည်းကာ တပ်ဖွဲ့ဝင်အသစ်များကို ခေါ်ယူပြီး ဌာနကိုတိုးချဲ့ဖွဲ့စည်းသွားမည် ” ဖြစ်ကြောင်းရေးသားထားသည်။
ထို့အပြင် ပြည်သူလူထုများနှင့် ပူးပေါင်းပြီး ပိုမိုလုံခြုံစိတ်ချရသော အနေအထားမျိုး ရရှိလာစေရန်အတွက်ကိုလည်း ယခုထက်ပိုမို အားစိုက်ကြိုးစား ဆောင်ရွက်သွားမည်ဖြစ်ကြောင်း အသိပေး ထားသည်ကိုတွ့ရသည်။
ရက္ခိုင်တွင် ၂၀၂၃ ခုနှစ် နိုဝင်ဘာလ ၁၃ ရက်နေ့မှစ၍ ယနေ့ထိ ပေါက်တော ၊ မြောက်ဦး ၊ ကျောက်တော် ၊ မင်းပြား ၊ မြေပုံ ၊ ရမ်းဗြဲ ၊ ရသေ့တောင် ၊ ပုဏ္ဏားကျွန်း ၊ ဘူးသီးတောင် ၊ သံတွဲ နှင့် ပလက်ဝ ဒေသတို့ကို AA က အပြီးသတ်သိမ်းပိုက်ရရှိခဲ့ပြီးဖြစ်ကာ ကျန်ရှိသည့်မြို့နယ်များအားလုံးကိုလည်း စစ်ကောင်စီကင်းစင်နယ်မြေဖြစ်အောင် သိမ်းပိုက်သွားမည်ဟု AA က ထုတ်ပြန်ထားသည်။
တိုက်ပွဲရှောင်နေစဥ်ကာလအတွင်း သိမ်းထား၊ ဝှက်ထားခဲ့သည့် ပစ္စည်းများ ပျောက်ဆုံးပါက အာရက္ခပြည်သူ့အစိုးရ၏ နီးစပ်ရာ နယ်မြေ ဒေသအုပ်ချုပ်ရေးမှူးများထံတွင် တိုင်ကြားနိုင်ကြောင်းလည်း AA ကထုတ်ပြန်အသိပေးထားသည်။