AB News – နိုဝင်ဘာ ၂၊ ၂၀၂၅
ဆိုဖီ
မကွေးတိုင်း၊ ပေါက်မြို့နယ် လက်ဘဲ့ရွာကို စစ်ကော်မရှင်က လေကြောင်းဗုံးကြဲ တိုက်ခိုက်မှုကြောင့် ကလေးငယ် ၁ ဦး အပါအဝင် အပြစ်မဲ့ပြည်သူ ၅ ဦး ဒဏ်ရာရရှိခဲ့ကြောင်း သိရသည်။
ယနေ့ နိုဝင်ဘာလ ၂ ရက်နေ့၊ နံနက် ၈ နာရီ ၆ မိနစ်ခန့်တွင် ပေါက်မြို့နယ်၏ အရှေ့မြောက်ဘက်ရှိ လက်ဘဲ့ရွာကို စစ်ကော်မရှင် တိုက်လေယာဉ် ၁ စီးဖြင့် ရည်ရွယ်ချက်ရှိရှိ ဗုံးကြဲတိုက်ခိုက်ခဲ့သည်။
ယင်းတိုက်ခိုက်မှုကြောင့် အသက် ၃ နှစ်အရွယ် ကလေးငယ် ၁ ဦး၊ အသက် ၆၀ အရွယ် အမျိုးသား ၁ ဦးနှင့် အသက် ၅၀ ကျော် အမျိုးသမီး ၃ ဦး စုစုပေါင်း ၅ ဦး ဒဏ်ရာရရှိခဲ့သည်။
ဒဏ်ရာရရှိသူများမှာ လက်ဘဲ့ရွာအနီးရှိ စစ်ရှောင်ယာယီတဲတွင် နေထိုင်သူများဖြစ်ကြောင်း သိရသည်။
လက်ရှိတွင် ၎င်းတို့အားလုံးကို နီးစပ်ရာ ဆေးရုံသို့ ပို့ဆောင်ကာ ဆေးကုသမှု ခံယူနေရကြောင်း သိရသည်။
ပြီးခဲ့သည့် အောက်တိုဘာလ ၂၇ ရက်နေ့ကလည်း ပေါက်မြို့နယ်၏ အနောက်ဘက်ခြမ်းကို တိုက်ပွဲဖြစ်ပွားခြင်းမရှိဘဲ စစ်ကော်မရှင်တပ်မှ Y-12 လေယာဉ် ၁ စီးဖြင့် ဗုံး ၅၉ လုံး ကြဲချ တိုက်ခိုက်ခဲ့ကြောင်းလည်း သိရသည်။