AB News – သြဂုတ် ၁၊၂၀၂၅
နွယ်စိုး
ရုရှားမှ ယူကရိန်းနိုင်ငံ၊ ကိယက်ဗ်မြို့ကို ဇူလိုင်လ ၃၁ ရက်နေ့ က ဒုံးကျည်များအပါအဝင် ဒရုန်းများဖြင့် ပစ်ခတ်ခဲ့သောကြောင့် ခြောက်နှစ်အရွယ် ကလေးငယ်တစ်ဦးအပါအဝင် လူ ၁၆ဦးသေဆုံးခဲ့ပြီး ၁၅၅ဦး ဒဏ်ရာရရှိသွားခဲ့သည်ဟု BBC သတင်းဌာနတွင် ဖော်ပြထားသည်။
ရုရှားသည် ညအချိန်အတွင်း ဒရုန်း ၃၀၉ စင်းနှင့် ခရုဇ်ဒုံးကျည် ၈ စင်းတို့ဖြင့် ယူကရိန်းနိုင်ငံ ၊ကိယက်ဗ်မြို့တော်၏ ခရိုင် (၇)ခုကို တိုက်ခိုက်ခဲ့ကြောင်း ယူကရိန်းလေတပ်မှ ပြောကြားခဲ့သည်။
အဆိုပါ တိုက်ခိုက်မှုအတွင်း ခြောက်နှစ်အရွယ်ကလေးငယ်တစ်ဦးအပါအဝင် ၁၆ဦး သေဆုံးခဲ့ပြီး ၁၅၅ဦး ဒဏ်ရာ ရရှိခဲ့သည်ဟု ယူကရိန်းပြည်ထဲရေး ဝန်ကြီးဌာနက ဆိုထားသည်။
ပြီးခဲ့သည့် ဇူလိုင်လ အစောပိုင်းက ရုရှားသမ္မတ ဗလာဒီမာပူတင်ကို အမေရိကန် သမ္မတ ဒေါ်နယ်ထရမ့်က သြဂုတ်လ ၈ ရက်နေ့ မတိုင်မီ အပစ်အခတ်ရပ်စဲရေးကို သဘောတူခြင်းမရှိလျှင် မော်စကိုအပေါ် ပိုမိုပြင်းထန်သော ဒဏ်ခတ်ပိတ်ဆို့မှုများ ချမှတ်ရန် ခြိမ်းခြောက်ခဲ့သည်။
သို့သော်လည်း ယူကရိန်းအပေါ် ရုရှား၏တိုက်ခိုက်မှုများသည် ဆက်လက်ဖြစ်ပွားနေဆဲဖြစ်သည်။
”ရုရှားနဲ့ ယူကရိန်း နှစ်နိုင်ငံစလုံးက အပစ်အခတ်ရပ်စဲရေးနဲ့ တာရှည်ခံငြိမ်းချမ်းရေးကို ညှိနှိုင်းရမယ်။ သဘောတူညီချက်တစ်ခု လုပ်ဖို့ အချိန်တန်ပြီ” ဟု ကုလသမဂ္ဂဆိုင်ရာ ယာယီအမေရိကန်ကိုယ်စားလှယ် John Kelley က ကုလသမဂ္ဂလုံခြုံရေးကောင်စီသို့ ကြာသပတေးနေ့တွင် ပြောကြားခဲ့သည်။
“သမ္မတ Trump က ဒါကို ဩဂုတ်လ ၈ ရက်နေ့ နောက်ဆုံးထားပြီး လုပ်ရမယ်လို့ ရှင်းရှင်းလင်းလင်း ပြောထားပါတယ်” ဟုလည်း ၄င်းက ပြောခဲ့သည်။
ဇူလိုင်လ ၂၉ ရက်ကနေ့လည်း ရုရှားမှ ယူကရိန်းနိုင်ငံ ၊အရှေ့တောင်ပိုင်းတွင် ရှိသော သားဖွားဆေးရုံနှင့် အကျဥ်းထောင်တို့ကို လေကြောင်းဖြင့် တိုက်ခိုက်မှု ပြုလုပ်ခဲ့သဖြင့် လူ ၁၉ ဦးထက်မနည်း သေဆုံးခဲ့သည်။
ယူကရိန်းသမ္မတ Volodymyr Zelenskyက “ကျွန်တော်တို့ရဲ့၊ အမေရိကန်နဲ့ ဥရောပရဲ့ ငြိမ်းချမ်းရေးလိုလားချက်အပေါ် ရုရှားရဲ့ တုံ့ပြန်မှုကို ကမ္ဘာက မြင်လာရပြန်ပါပြီ။ နောက်ထပ် သရုပ်ပြ သတ်ဖြတ်မှုပဲ” ဟု ၎င်းက ဆိုရှယ်မီဒီယာတွင် ပြောကြားခဲ့သည်။
ယင်းအပြင် ရုရှားကာကွယ်ရေးဝန်ကြီးဌာနကလည်း ယူကရိန်း စစ်လေယာဉ်ကွင်းများနှင့် ခဲယမ်းသိုလှောင်ရုံများအပြင် စစ်ဖက်စက်မှုဆိုင်ရာ ဆက်စပ်စီးပွားရေးလုပ်ငန်းများကိုပါ ပစ်မှတ်ထား တိုက်ခိုက်ခဲ့ကြောင်း အတည်ပြု ပြောကြားထားသည်။