AB News – မေ ၈၊ ၂၀၂၄
ရက္ခိုင်ပြည်၊ မောင်တောမြို့တွင် အာရက္ခတပ်တော်နှင့် စစ်ကောင်စီတို့ တိုက်ပွဲပြင်းထန်နေပြီး စစ်ကောင်စီက မောင်တောမြို့ဝင်/ထွက်ဂိတ်များအားလုံးကို ယနေ့ပိတ်ဆို့လိုက်ကာ တံတား ၃စင်းကိုလည်းမိုင်းခွဲဖျက်ဆီးလိုက်ကြောင်း သတင်းရရှိသည်။
ယနေ့ မေလ ၈ ရက်၊ နံနက်ပိုင်းတွင် မောင်တောမြို့ ကညင်ချောင်းစီးပွားရေးဇုန်အနီးတွင်ရှိသည့် စစ်ကောင်စီတပ်သားများကို အာရက္ခတပ်တော်က ထိုးစစ်ဆင်တိုက်ခဲ့ရာ ၂ ဖက် စစ်ရေးပြင်းထန်နေကြောင်း သိရသည်။
မောင်တောမြို့အဝင်/အထွက်လမ်းများအားလုံးကို စစ်ကောင်စီက ပိတ်ဆို့ထားလိုက်ပြီးဖြစ်ကြောင်း ဒေသခံတစ်ဦးက AB News သို့ပြောသည်။
“တိုက်ပွဲပြင်းထန်နေပါတယ်။ စစ်ကောင်စီက မောင်တောမြို့အဝင်/အထွက်ဂိတ်တွေ၊ လမ်းတွေအကုန်လုံးကိုပိတ်ထားလိုက်ပါပြီ။ ပြည်သူတွေလည်း အပြင်မထွက်ဝံ့ဘူး။ နေဗီတွေကလည်း လက်နက်ကြီးတွေနဲ့ လှမ်းပစ်နေတယ်” ဟုဆိုသည်။
အကြမ်းဖက်စစ်ကောင်စီသည် မောင်တောမြို့နယ်အတွင်းရှိ စစ်ရေးအရ အဓိကအရေးပါသည့် တံတား ၃ စင်းကိုလည်း ဖျက်ဆီးထားသည်ကို တွေ့ရသည်။
ယနေ့ မေလ ၈ ရက်၊ နံနက် ၇ နာရီ ၃၀ မိနစ်တွင်မြို့သူကြီးအခြေစိုက် စစ်ကောင်စီတပ်သား ၃၀ ခန့်က ၃ မိုင်/ ကျီးကန်းပြင်ကားလမ်းမအထက် ဇူလမှုရွာအနီးရှိ အလျား ( ၁၀၀) ပေ၊ အနံ ( ၁၂) ပေရှိသည့် ၃ မိုင်သံတံတားကို မိုင်းခွဲဖျက်ဆီးခဲ့ကြောင်း သိရသည်။
ထို့အပြင် မေလ ၇ ရက်၊ ညဥ့် ၁၂ ရီအချိန်တွင် ၃ မိုင် မောင်တောကားလမ်းနှင့် ဇူလရွာသို့ ဆက်သွယ်ဖောက်လုပ်ထားသည့် အလျား ( ၁၆) ပေ၊ အနံ ( ၁၂) ပေရှိသော ကံကျမြောက်ရွာ ကွန်ကရစ်တံတားကိုလည်း ဖျက်ဆီးသွားခဲ့ကြောင်း ဒေသခံများပြောပြချက်အရသိရသည်။
အလားတူ အကြမ်းဖက်စစ်ကောင်စီနှင့် စစ်သွေးကြွမူဆင်များသည် ပြီးခဲ့သည့် မေလ ၆ ရက် ညဥ့် ၁၂ နာရီတွင်လည်း မောင်တောမြို့နယ်၊ ရွှေဇားကျေးရွာအုပ်စု ဂေါင်ညာရွာ – လဘော်ဇားရွာကြား အလျား ( ၅၀၀) ပေ၊ အနံ ( ၁၂ )ပေ ရှိသော ကွန်ကရစ်တံတားကို မိုင်းခွဲဖျက်ဆီးခဲ့သည်ကိုတွေ့ရသည်။
ထို့အပြင် စစ်ကောင်စီသည် မောင်တောမြို့အဝင် နခခ (၅) အနီးရှိသည့် ဝေသာလီရွာကိုလည်း မီးရှို့ဖျက်ဆီးခဲ့ရာ ကျေးရွာတွင်းရှိ ပြည်သူများကို သေနတ်ဖြင့် လိုက်ပစ်ခဲ့၍ အသက် ၃၅ နှစ်အရွယ် အမျိုးသမီး တစ်ဦး သေဆုံးခဲ့ရပြီး ထိုအမျိုးသမီး၏ သားနှင့် သမီးတို့မှာလည်း ကျည်ထိ ဒဏ်ရာများ ပြင်းထန်စွာ ရရှိခဲ့ကြောင်း သိရသည်။