AB News – ဒီဇင်ဘာလ ၄၊ ၂၀၂၅
အောင်စိုး
ရက္ခိုင်ပြည် ကျောက်ဖြူမြို့နယ်တွင် စပါးရိတ်သိမ်းနေသည့် သားအမိ အမျိုးသမီး ၂ ဦး စစ်ကော်မရှင်၏ ဒရုန်းမှ ဗုံးကြဲချမှုကြောင့် သေဆုံးသွားပြီး ၁ ဦး ထိခိုက်ဒဏ်ရာရရှိခဲ့ကြောင်း စစ်ရေးသတင်းရင်းမြစ်အရ သိရသည်။
သေဆုံးသွားသည့် အမျိုးသမီး ၂ ဦးမှာ မိခင်ဖြစ်သူ ဒေါ်မဝင်းကြည် နှင့်သမီးဖြစ်သူ ဒေါ် ခင်ဝင်းကြည် တို့ဖြစ်ပြီး ဒဏ်ရာရရှိခဲ့သူ၏ အမည်ကို AB News မှ စုံစမ်းနေဆဲဖြစ်သည်။
ယမန်နေ့ ဒီဇင်ဘာလ ၃ ရက်နေ့ နံနက် ၉ နာရီကျော်အချိန် လိပ်ပြင်ကျိန် (ဒွိန်) ကျေးရွာ အနီး စပါးခင်းတွင် စပါးရိတ်သိမ်းနေစဥ် စစ်ကော်မရှင်မှ ဒရုန်းဖြင့် ဗုံးကြဲတိုက်ခိုက်ခဲ့ခြင်းဖြစ်ကြောင်း သိရသည်။
ဒရုန်းဗုံးကြဲတိုက်ခိုက်မှုကြောင့် သေဆုံးသွားသူများသည် ကျောက်ဖြူမြို့နယ်၊ ဝါးတောကျေးရွာ ဇာတိဖြစ်ပြီး၊ တိုက်ပွဲများကြောင့် စစ်ဘေးရှောင်နေကြသူများ ဖြစ်ကြောင်း စစ်ရေးသတင်းရင်းမြစ်ကဆိုသည်။
စစ်ကော်မရှင်သည် ကျောက်ဖြူမြို့ အနီးအနားကျေးရွာများသို့ လက်နက်ကြီး၊ လေကြောင်းတိုက်ခိုက်မှုများအပြင်၊ ဒရုန်းတိုက်ခိုက်မှုများကြောင့် ဒေသခံပြည်သူများ ထိခိုက်သေဆုံးမှုများ ရှိနေပြီးသောင်းချီသော ပြည်သူများမှာ ဘေးလွတ်ရာ တိမ်းရှောင်နေကြရသည်။
ယင်းအပြင် နှစ်ဖက်တိုက်ပွဲပြင်းထန်မှုများကြောင့် ဘေးလွတ်ရာသို့ ထွက်ပြေးတိမ်းရှောင်နေရသည့် ပြည်သူများမှာ အရေးပေါ်စားနပ်ရိက္ခာနှင့် လူသားချင်းစာနာထောက်ထားမှုဆိုင်ရာလုပ်ငန်းများ အရေးပေါ်လိုအပ်နေကြောင်း ဒေသတွင်းစစ်ဘေးရှောင်အရေး ကူညီနေသူများထံမှ သိရသည်။