AB News – ဧပြီ ၂ ၊ ၂၀၂၅
ပလက်ဝအပါအဝင် ရက္ခိုင်က လွတ်မြောက်ဒေသများတွင် ULA/ AA က အရွယ်ရောက်ပြီးသူများကို တစ်အိမ်တစ်ယောက်ကျ စစ်မှုထမ်းခေါ်ဆောင်လျှက်ရှိရာ ကိုယ်ဝန်ဆောင်၊ ကလေးမိခင်နှင့် သက်ကြီး မိဘများအား လုပ်ကျွေးနေသူများစသည်တို့ကို အာရက္ခတပ်တော်က စစ်မှုထမ်း ကင်းလွတ်ခွင့်ပေးထားကြောင်း သိရသည်။
ULA/AA ၏ စစ်မှုထမ်းခေါ်ယူမှုကို တချို့ ပြည်သူများက “မိမိတို့ဒေသကို မိမိတို့ကိုယ်တိုင် ကာကွယ်ရန် လိုအပ်သည်” ဟု ထောက်ခံကြပြီး၊ တခြားတစ်ချို့က “မိသားစုထဲက တစ်ဦး စစ်မှုထမ်းနေလျှင် စားဝတ်နေရေး အခက်ကြုံမည်” ဟု ပြီး စိုးရိမ်ကြသည်။
“ကျွန်တော်တို့ မြို့မှာတော့ လူတိုင်း ဒီကိစ္စကို နားလည်တယ်။ ဒေသကို ကိုယ်တိုင်ကာကွယ်ဖို့ ကျွန်တော်တို့လူငယ်တွေအနေနဲ့ တာဝန်ယူဖို့ လိုအပ်ပါတယ်။ စစ်မှုထမ်းခေါ်ယူတာက တိုင်းပြည်အတွက် တာဝန်တစ်ခု ဖြစ်တယ်” ဟု မောင်တောမြို့မှ ဒေသခံ အမျိုးသားတစ်ဦးက AB News သို့ ပြောသည်။
ULA /AA က ရက္ခိုင်က လွတ်မြောက်ဒေသများတွင် အုပ်ချုပ်ရေး ၊ တရားစီရင်ရေး ၊ တရားဥပဒေစိုးမိုးရေး ၊ စီးပွားရေး ၊ ပညာရေး ၊ ကျန်းမာရေး ၊ မွေးမြူရေး ၊ ဒေသဖွံ့ဖြိုးရေး နှင့် ပြည်သူ့ ဝန်ဆောင်မှုလုပ်ငန်း စသည့် ကဏ္ဍအသီးသီးကို တာဝန်ယူ ဖော်ဆောင်လျှက်ရှိသည်။
ထိုကဲ့သို့သော ကဏ္ဍများတွင် တာဝန်ယူလုပ်ဆောင်မည့် သူများ ၊ ထိန်းချုပ်နယ်မြေများကို ကာကွယ်စောင့်ရှောက်မည့် သူများနှင့် နယ်စပ်လုံခြုံရေးများအတွက် ULA / AA က လိုအပ်နေသော လူသားစွမ်းအင် လူ့အရင်းမြစ်များအတွက် စစ်မှုထမ်းခေါ်ဆောင်ရခြင်းဖြစ်ကြောင်း သိရှိရသည်။
ထိုအထဲတွင် ခြွင်းချက်အနေဖြင့် အသက် ၁၈ နှစ်ပြည့်ပြီးဖြစ်သော ကိုယ်ဝန်ဆောင်အမျိုးသမီးများ ၊ ကလေးမိခင်များနှင့် သက်ကြီးရွယ်အို မိဘများအား လုပ်ကျွေးပြုစုနေသည့် သားသမီးများကို ULA/AA စစ်မှုထမ်း ကင်းလွတ်ခွင့်ပြုထားကြောင်း သိရသည်။
ထို့အပြင် အတန်းပညာသင်ကြားနေသူများ ၊ HIV/ AIDS /TB ၊ ကျောက်ကပ်ရောဂါ ၊ ဂေါက်ရောဂါ နှင့် နှလုံးရောဂါ စသည့် ကူးစပ်ရောဂါနှင့် နာတာရှည် ရောဂါဝေဒနါ ခံစားနေရသူများကိုလည်း ULA AA စစ်မှုထမ်းခြင်းမှ ကင်းလွတ်ခွင့်ပြုထားကြောင်း ဒေသခံများ၏ ပြောဆိုချက်အရသိရသည်။
”ကျမတို့မြောက်ဦးမြို့မှာ ရွာလူကြီးတွေက စစ်မှုထမ်းသွားမယ့်သူတွေကို မဲစနစ်နဲ့ ရွေးတယ်။ ဆိုတေ့ာ အဲဒီထဲမှာ နို့စို့အရွယ် ကလေးအမေတွေ ၊ ကိုယ်ဝန်ဆောင်အမျိုးသမီးတွေ ၊ နာတာရှည် ရောဂါဝေဒနါခံစားနေရတဲ့ သူတွေ ပါသွားတာရှိတယ်။ အဲ့ဒီ လူတွေကို AA က စစ်မှုးထမ်းစရာမလိုဘူး ဆိုပြီးတေ့ာ ပြန်ပို့လိုက်တယ် ” ဟု မြောက်ဦးမြို့မှ ဒေသခံအမျိုးသမီး ၁ ဦးက AB News သို့ပြောသည်။
မြောက်ဦးမြို့နယ်တွင် ရွာလူကြီးများ ပြုလုပ်သည့် မဲစနစ်ဖြင့် စစ်မှုထမ်းရန် တာဝန်ကျသူများထဲမှ ကိုယ်ဝန်ဆောင်၊ ကလေးမိခင်၊ သက်ကြီးရွယ်အိုမိဘများကို လုပ်ကျွေးနေရသူ၊ အတန်းပညာသင်ယူနေသူနှင့် နာတာရှည်ရောဂါ ခံစားနေရသူ ၅၀ ခန့်ကို ULA/AA က စစ်မှုထမ်း ကင်းလွတ်ခွင့်ပြုလိုက်ပြီး နေအိမ်များသို့ ပြန်ပို့ပေးလိုက်ကြောင်း ခိုင်လုံသတင်းရင်းမြစ်အရ သိရသည်။
ရက္ခိုင်တွင် စစ်မှုထမ်းရန် အကြုံးဝင်သူများမှာအမျိုးသမီးဆိုလျှင် အသက် ၁၈ နှစ်မှ ၃၅ နှစ်အရွယ် ၊ အမျိုးသား ဆိုလျှင် အသက် ၁၈ နှစ်မှ ၄၅ နှစ်အရွယ်အတွင်း ကျန်းမာသန်စွမ်းသူများ ဖြစ်ရမည်ဟု AB News ကစုံစမ်းသိရှိရသည်။
တစ်အိမ် တစ်ယောက်ကျစီ စစ်မှုမထမ်းမနေရ စနစ်ဖြင့် စစ်မှုထမ်းခေါ်ဆောင်ခြင်းနှင့် ပတ်သက်၍ ULA AA က အသေးစိတ် ထုတ်ပြန်ပြောဆိုထားခြင်း မရှိသေးပေ။